Украинада соңку суткада Орусиянын чабуулдарынан кеминде 14 жайкын тургундун өмүрү кыйылганын өлкөнүн полиция кызматы 8-июнда билдирди. Эң оор соккуга Харьков, Херсон жана Донецк облустары туш болгону, каза тапкандардан тышкары 68 киши жараат алганы кабарланды.
Ракета, башкарылуучу авиабомба, согуштук дрон менен аткыланган Харьков облусунда алты өмүр кыйылганы, жараат алгандардын экөө балдар, алардын бири 1,5 айлык ымыркай экени, Донецк облусунда төрт киши каза болгону, үйлөр, имараттар талкаланганы, Херсон облусунда да төрт өлүм катталганы маалымдалды.
Орусиянын Украинага каршы толук масштабдуу согушу 2022-жылы февралда башталган. Бул өлкөнүн жетекчилиги Украинанын шаар-кыштактары, жарандык инфраструктурасы атайылап талкаланып, жайкын тургундар өлтүрүрүп жатканын тууралуу айыптоолорду четке кагууда.
Украин бийлиги жана эл аралык уюмдар Орусиянын чабуулдарын аскердик кылмыш деп кароо керек деп эсептешет.
8-июнга караган түнү Орусиянын Тула облусундагы Новомосковск шаарында жайгашкан "Азот" химиялык заводу учкучсуз учактардын чабуулуна кабылды. Бул тууралуу орусиялык Телеграм каналдар кабарлашты, маалыматты облус губернатору Дмитрий Миляев да тастыктады.
Миляевдин айтымында, соккудан улам заводдун аймагында өрт тутанды, кеминде эки киши жараат алды.
"Азот" заводунда башка продукция менен катар аммиак селитрасы өндүрүлөт, бул затты жардыргыч жасоо үчүн колдонсо болот. Ал эми ушул эле ишканадан чыккан метанол ракетанын күйүүчү отунун даярдоодо, аргон темир жол өнөр жайында колдонулат.
Ушуну менен бул ишкана соңку эки апта ичинде экинчи жолу соккуга кабылды. 24-майда да аны согуштук дрондор бутага алган.
Орусиянын Коргоо министрлиги жекшембиге караган түнү абадан коргонуу системалары Украина тараптан учурулган 61 дронду атып түшүрүштү. Учкучсуз учактар Брянск, Белгород, Калуга, Тула, Орел, Курск жана Москва облустарынын жана аннексияланган Крым жарым аралынын аймагын бутага алганы маалымдалды.
Оккупацияда турган Мелитополь шаарында "Гидромаш" заводу өрттөнүп жатканы да кабарланууда. Бул ишкана учактын бардык түрлөрүнө зарыл тетиктерди жасайт.
Москванын мэри Сергей Собянин өткөн түнү борбор калааны көздөй учуп бараткан кеминде 10 дрон атып түшүрүлгөнүн Телеграм каналына жазды.
Эртең менен Москванын "Внуково" жана "Домодедово" аэропортторунда учактардын учуп-конуусуна кайрадан убактылуу чектөө киргизилди.
7-июнга караган түнү Украинанын чыгышындагы Харьков шаары Орусиянын согуш башталгандан берки эң катуу соккусуна кабылганын өлкө бийлиги кабарлоодо.
Эртең мененки расмий маалыматка караганда, шаар 50 чакты согуштук "Шахед" дрону, эки ракета жана башкарылуучу төрт авиабомба менен аткыланды. Көп жерде кыйроо болуп, өрт тутанды.
Каза болгондор кеминде үч адам экени, дагы 21 адам жараат алганы, жабыркагандардын саны улам көбөйүп жатканы маалымдалууда.
Облустук администрациянын башчысы Олег Синегубов жараат алгандар арасында балдар да бар экенин, алардын бири 1,5 айлык ымыркай деп аныкталганын айтты.
Ишембиге караган түнү Орусиянын жапырт чабуулуна өлкөнүн түштүгүндөгү Херсон шаары да кабылды. Соккулардын кесепетинен кеминде эки өмүр (56 жаштагы эркек жана 54 жаштагы аял) кыйылганын, дагы бир нече жайкын тургун жараат алганын жергиликтүү бийлик кабарлоодо.
Украинанын Куралдуу күчтөрүнүн соңку маалыматына караганда, өткөн түнү Орусия бул өлкөнүн аймагына согуштук дрондордон 206ны, "Искандер-М/KN-23" баллистикалык ракеталарынан экини, башкарылуучу Х-59/69 авиациялык ракеталарынан алтыны жана "Искандер-К" канаттуу ракетасынан бирди учурду. Дрондордун 87си, ракеталардан жетөө атып түшүрүлгөнү маалымдалды.
Украина 6-июнга караган түнү кайрадан Орусиянын жапырт ракета жана дрон чабуулуна кабылганын, жайкын тургундардын өмүрү кыйылып, айрым жерлерде жарандык инфраструктура кыйраганын маалымдоодо.
Өлкөнүн ички иштер министрлигинин билдирүүсүнө караганда, борбор калаа Киевде орусиялык соккунун кесепетин жоюу ишине тартылган үч куткаруучунун өмүрү кыйылды, алар аткылоого карабастан адамдарга жардам берип жаткан жеринен мерт кетти. Борбор калаа мэри түнкү аткылоодон каза тапкандардын жалпы саны төрт киши экенин айткан.
Өзгөчө кырдаалдар мекемесинин дагы тогуз куткаруучусу жараат алганы, арасында абалы оорлору бар экени кабарланууда.
Тернополь шаарында да Орусиянын чабуулунан тутанган өрт менен алышып жатып беш куткаруучу жараат алганы маалымдалды.
Орусия стратегиялык бомбалоочу учактарынан канаттуу ракеталарын Сумы облусунун аймагынан, Кара деңиз тараптан учурганын Украинанын Аскердик аба күчтөрүнүн басма сөз кызматы билдирди.
Чернигов шаары баллистикалык ракета жана учкучсуз учак менен аткыланганын, үйлөр талкаланып, адамдар жабыркаганын шаар башчысы Александр Ломако жазды.
Өлкөнүн түндүк-батышындагы Луцк шаарында согуштук дрондордун соккусунан беш киши жараат алганын, жалпысынан бул калаанын аймагы 15 учкучсуз учак жана алты ракета менен аткыланганын мэр Игорь Полищук кабарлады.
Орусия бул түнү согуштук дрондору, канаттуу жана баллистикалык ракеталары менен Киев, Чернигов, Луцк, Тернополь, Кривой Рог, Харьков, Львов, Хмельницкий, Одесса, Николаев, Черкасск аймактарын бутага алды.